СДСМ преку соопштение обвини дека средбата одржана зад затворени врати во хотелот „Лимак“, на која присуствувале поранешни функционери на партијата, претставници на ЗНАМ и членови на други политички субјекти, претставува обид за слабеење на партијата.
Од СДСМ тврдат дека таканаречената „платформа“ не е реформска иницијатива, туку, како што наведуваат, координирана операција за создавање „лажна опозиција“ која има за цел да ја одржува партијата во состојба на постојана внатрешна криза.
Во соопштението се наведува дека дел од учесниците на средбата биле вклучени во креирањето на изборната програма и кампањата за парламентарните избори во 2024 година, по кои СДСМ го доживеа најтешкиот изборен пораз. Од партијата оценуваат дека истите лица денес се обидуваат да ја напаѓаат партијата однадвор, наместо да придонесат за нејзиното зајакнување.
СДСМ посочува дека фактот што средбата се одржала без присуство на јавноста и, како што наведуваат, без критики кон политиките на Владата, туку со фокус кон внатрешните состојби во партијата, според нив говори за вистинската цел на иницијативата.
Во соопштението се додава дека партијата нема да дозволи, како што наведуваат, нејзината иднина да ја определуваат затворени состаноци и поранешни функционери кои ја напуштиле во најтешкиот период.
Од СДСМ оценуваат дека нивната консолидација продолжува преку членството и актуелното раководство, а иницијативата ја нарекуваат проект насочен кон слабеење на опозицијата.
