Пленковиќ откри кој ќе ја претставува Европа во мировните разговори за Украина

Европските институции, заедно со Германија, Франција, Обединетото Кралство, Италија и Полска, ќе го сочинуваат јадрото на европското претставување во преговорите меѓу Украина и Русија, соопшти хрватскиот премиер Андреј Пленковиќ по неформалниот самит на Европската Унија во Даблин.

Тој појасни дека станува збор за таканаречениот формат Е5, преку кој петте држави ќе придонесуваат во мировните напори за Украина, заедно со челниците на европските институции.

— реклама —

Пленковиќ оцени дека расправата за тоа кој ќе ја претставува Европа е несоодветна, 12 години по почетокот на руската агресија. Според него, најважно е да се почитуваат јасните принципи, пред сè територијалниот интегритет на Украина и меѓународното право.

Тој нагласи дека секој договор за прекин на огнот мора да има привремен карактер, а по завршувањето на воените дејствија треба да следуваат чекори за враќање на окупираните територии во составот на Украина и во нејзиниот уставно-правен поредок.

— реклама —

Разговорите за натамошното финансирање на Украина се одложени за следниот самит на ЕУ, кој за две недели ќе се одржи во Брисел.

— реклама —

Во меѓувреме, германскиот канцелар Фридрих Мерц се закани дека ќе го блокира следниот седумгодишен буџет на Европската Унија за периодот од 2028 до 2034 година доколку сите земји-членки не се согласат заеднички да учествуваат во натамошното финансирање на Украина. Ваквата најава следува откако Бугарија, Чешка, Унгарија и Словачка соопштија дека не сакаат да учествуваат во оваа помош.

Станува збор за гаранции од европскиот буџет за финансирање на потребите на украинската држава. Европската Унија за следната година треба да обезбеди дополнителни 45 милијарди евра.

— реклама —

Прашан за ставот на Загреб, Пленковиќ рече дека Хрватска е солидарна со Украина, но нагласи дека нема директни финансиски обврски за земјата, бидејќи средствата се обезбедуваат од заедничкиот европски буџет.

Тој додаде дека за Хрватска е важно и натаму да добива значителни средства од европскиот буџет, а според последниот предлог, станува збор за околу седум милијарди евра повеќе.