Хрватскиот премиер Андреј Пленковиќ оцени дека Македонија бележи напредок во исполнувањето на критериумите за членство во Европската Унија, но нагласи дека спорот со Бугарија и натаму останува главна пречка во евроинтегративниот процес.
На заедничката прес-конференција во Охрид со премиерот Христијан Мицкоски, Пленковиќ изјави дека по изборите во Бугарија се очекуваат првите конкретни чекори и контакти на релација Скопје–Софија.
Тој посочи дека Хрватска внимателно го следи дијалогот меѓу двете земји и ќе продолжи да помага во надминувањето на пречките што постојат во процесот.
Пленковиќ се осврна и на иницијативата поврзана со нон-пејперот на германскиот канцелар Фридрих Мерц за идното проширување на Унијата, оценувајќи дека размислувањата во Берлин пред сè се насочени кон европската перспектива на Украина.
Според него, не смее да има селективен пристап во процесот на проширувањето.
„Не може да има кратенки за едни, а бавност за други“, порача Пленковиќ, нагласувајќи дека сите земји кандидати треба да бидат третирани според истите принципи.
Тој додаде дека идните модели на европска интеграција и институционално приближување ќе бидат тема на претстојните самити во Црна Гора и во Брисел.
Пленковиќ истакна дека Хрватска останува на ставот дека процесот на проширување мора да се базира на индивидуални заслуги, но и на рамноправен третман на сите држави кандидати.
