По 20 години повторно поставена бистата на Стив Наумов пред студентскиот дом

По речиси две децении, пред студентскиот дом „Стив Наумов“ во скопска Автокоманда повторно е поставена бистата на народниот херој Стефан Стив Наумов. Споменикот беше откриен денеска, на денот кога се одбележуваат 106 години од неговото раѓање, во присуство на претставници на Сојузот на борците од НОВ, кои положија цвеќе.

— реклама —

Обновата е реализирана на иницијатива на Димитар Бојков, внук од сестра на Наумов, со поддршка од Министерството за образование и наука, Општинската организација на Сојузот на борците од НОБ – Гази Баба и раководството на Државниот студентски дом „Скопје“.

— реклама —

Бојков посочи дека претходната биста била украдена, а постаментот со текот на времето почнал да се оштетува. И покрај повеќегодишните барања за обнова, споменикот не бил обновен поради недостиг од средства. Тој им се заблагодари на министерката за образование и наука, Весна Јаневска, и на нејзините соработници за обезбедувањето средства, како и на вајарот Далибор Николовски – Дачо, кој ја изработил новата биста.

Претседателот на Општинската организација на Сојузот на борците од НОБ – Гази Баба, Трајче Георгиевски, истакна дека со обновата се одбележува роденденот на Наумов, кој загинал пред да наполни 22 години. Тој посочи дека ова е последниот од 26 споменици и спомен-обележја во Гази Баба, Петровец, Илинден и Арачиново што организацијата успеала да ги обнови.

— реклама —

Директорот на Државниот студентски дом „Скопје“, Александар Каровски, се заблагодари за поддршката од Владата и МОН. Тој истакна дека по реконструкцијата студентите имаат подобри услови за престој, а се осврна и на поплаките за протекување вода во објектот. Според него, станува збор за помали проблеми предизвикани од затнувања, кои се санираат во соработка со изведувачите, додека објектот и опремата имаат гаранција од 18 години.

Во студентскиот дом моментално се сместени 1.014 студенти во зградите и уште 138 во бараките. На располагање им се соби, читална, менза и други заеднички простории.