(Фото) Јаневска отиде во студентскиот „Стив Наумов“, но не нашла распаднати ѕидови и протечени кровови

Министерката за образование и наука Весна Јаневска го посети студентскиот дом „Стив Наумов“ во скопска Автокоманда, по обвинувањата од СДСМ за состојбата во реконструираниот објект. Таа тврди дека нема распаднати ѕидови и протечени кровови и дека студентите имаат одлични услови за престој.

Јаневска соопшти дека на посетата ги поканила претставниците на СДСМ и медиумите, но дека од опозициската партија не дошле.

— реклама —

„Прошетавме низ објектот, поразговаравме со студентите. Нема распаднати ѕидови и протечени кровови, има одлични услови!“, порача министерката.

Таа ја обвини СДСМ за манипулации и за вознемирување на родителите на студентите сместени во домот, кој, според нејзината објава, бил пуштен во употреба минатиот месец по темелната реконструкција со поддршка од Европската унија.

— реклама —

„Да бидат без грижи, студентите се сместени во најмодерниот дом во регионот“, наведе Јаневска во пораката до родителите.

Министерката посочи дека во објектот во моментов се сместени 1.150 студенти. Притоа, остави можност да се појават технички проблеми поради големината на домот и бројот на соби, тоалети и заеднички простории, но нагласи дека објектот е под гаранција.

„Но бидејќи е под гаранција, изведувачот веднаш интервенира и ги санира предизвиците“, напиша таа.

— реклама —

Јаневска објави дека споделува фотографии од сегашната состојба и од условите во студентските домови до 2024 година, правејќи споредба со периодот кога СДСМ беше на власт.

Таа најави дека наскоро ќе биде отворен и вториот реновиран студентски дом, по што, според неа, ќе следува реконструкција и на останатите. Најави и зголемување на субвенционираниот студентски оброк, како и промена на моделот за негово користење, заради поефикасно искористување на средствата.