По пауза од речиси две години, жителите на Скопје повторно добиваат субвенции за набавка на инвертер клима-уреди. Градоначалникот Орце Ѓорѓиевски доцна вечерва објави дека се потпишани решенијата за исплата на средствата согласно јавниот повик на кој аплицираа скопјани.
Со оваа мерка, Градот ги поддржува домаќинствата кои во текот на 2025 година инвестирале во високо ефикасни инвертер-системи, со цел намалени трошоци, повисока енергетска ефикасност и подобри услови за живеење. Градот ќе им надомести до 20.000 денари по домаќинство, во нето-износ, при што данокот на личен доход целосно ќе го покрие.
Од Градот истакнуваат дека ваквите уреди носат директни придобивки за животната средина преку намалена потрошувачка на енергија и пониски емисии, што придонесува кон почист воздух и поодржливо Скопје.
Ѓорѓиевски најави дека во наредниот период ќе бидат објавени нови јавни повици за субвенции со цел да се олесни животот на граѓаните и да се поддржат мерки кои водат кон подобар квалитет на живеење.
