Две нови островски формации се појавиле во близина на индонезискиот вулкан Анак Кракатау по серијата ерупции минатиот месец, соопштија индонезиските власти. Сателитските снимки покажуваат дека формациите се наоѓаат на помалку од еден километар од вулканот.
Индонезискиот Центар за вулканологија и ублажување на геолошките ризици (PVMBG) соопшти дека на снимките од сателитот „Сентинел“ се забележуваат две формации што наликуваат на мали острови.
Сепак, властите предупредуваат дека е прерано тие да се наречат „потомци“ на Анак Кракатау, бидејќи сè уште нема доволно податоци за нивното потекло и начинот на кој настанале.
Вулканот еруптирал на почетокот на септември, по што биле затворени неколку аеродроми во земјата, а биле откажани стотици летови. Ерупциите и вулканската пепел го нарушиле воздушниот сообраќај во повеќе делови на Индонезија.
Засега не е извршено теренско истражување за да се утврди од каков материјал се состојат новите формации и како точно се формирале.
„Сè уште не можеме да потврдиме дали овие две формации навистина се нови еруптивни центри или само насобран вулкански материјал создаден за време на ерупцијата“, изјавила претставничката на PVMBG, Рита Сусилавати.
Слични појави во минатото веќе биле забележани во областа на Анак Кракатау. Почнувајќи од 1927 година, на неколку наврати се појавувала копнена маса која краткотрајно излегувала над морето, но потоа исчезнувала поради ерозијата. Во 1930 година, на тоа подрачје се формирал траен остров.
Според Сусилавати, и двете нови формации можеби нема да останат долго над морската површина, бидејќи брановите би можеле да ги еродираат и повторно да ги потопат.
Властите ги предупредија населението и посетителите да не се приближуваат на помалку од три километри од вулканот. Анак Кракатау моментално се наоѓа на второто ниво на опасност од вкупно четири степени.
Името Анак Кракатау на индонезиски значи „детето на Кракатау“. Вулканот се наоѓа на местото на поранешниот Кракатау, чија катастрофална ерупција во 1883 година била една од најпознатите и најразорните вулкански ерупции во историјата.
Се проценува дека во катастрофата загинале околу 35.000 луѓе, а голем дел од жртвите биле последица на огромните цунами што по ерупцијата ги погодиле бреговите на околните острови.
Анак Кракатау почнал повторно да се појавува над морето неколку децении по катастрофалната ерупција, а трајната копнена формација во ова подрачје се формирала во 1930 година. Оттогаш вулканот повеќепати еруптирал.
По ерупцијата на почетокот на септември, петмина новинари кои известувале од глисер исчезнале без трага. Се претпоставува дека загинале, заедно со тројца членови на екипажот што се наоѓале на пловилото.
Анак Кракатау се наоѓа во Сундскиот Теснец, меѓу Јава и Суматра, на околу 150 километри источно од Џакарта. Станува збор за геолошки многу активно подрачје во кое редовно се забележуваат вулкански и сеизмички активности.
