Тимовите за спасување во Индонезија започнаа операција за извлекување на траектот „Virgo Transport 8“, кој минатиот викенд се преврте и потона во Јаванското Море. По несреќата сè уште се трага по 129 лица.
Траектот во неделата рано наутро пловел од Сурабаја кон Бањармасин кога бил зафатен од силно невреме, по што се превртел. Во несреќата досега се потврдени шест жртви, додека 108 лица биле спасени.
На петтиот ден од потрагата не се пронајдени нови преживеани ниту тела. Силните морски струи и високите бранови ја отежнуваат операцијата, поради што властите одлучиле прво да го исправат потонатиот брод за да овозможат полесен пристап до него.
Бродот неколку дена делумно пловел, но во четвртокот вечерта целосно потонал на морското дно.
„Операцијата за извлекување веќе започна. Планот е бродот да се повлече кон поплиток дел од морето, а потоа да се исправи“, изјави командантот на морнарицата во Бањармасин, Галих Нурна Путра.
Според индонезиските власти, операцијата ќе ја води сопственикот на бродот, со поддршка од службите за спасување, морнарицата и поморската полиција. Откако бродот ќе биде исправен, ќе започне извлекувањето и евакуацијата.
Во потрагата денеска се вклучени осум бродови и два хеликоптери, но временските услови, силниот ветер, морските струи и високите бранови и натаму го отежнуваат спасувањето.
