Индонезија денеска повторно го отвори својот главен аеродром во Џакарта, како и уште четири аеродроми кои беа затворени поради вулканската пепел од ерупцијата на вулканот Анак Кракатау.
Пепелта од вулканот, кој се наоѓа меѓу островите Јава и Суматра, го прекри главниот град Џакарта и околните подрачја по првата ерупција што се случи пред четири дена.
Министерот за сообраќај Дуди Пурваганди соопшти дека главниот аеродром во Џакарта, „Сукарно-Хата“, повторно е отворен откако ветерот ja однел вулканската пепел од подрачјето.
Пред повторно да бидат пуштени во сообраќај, ќе биде проверена исправноста на 178 авиони кои биле приземјени за време на затворањето на аеродромот.
„Можеби ќе биде потребно дополнително време за авионите да бидат подготвени“, изјави Пурваганди.
Од денеска повторно се отворени и уште четири аеродроми, меѓу кои и помал аеродром во Џакарта и аеродромот во соседниот град Бандунг.
Поради ерупцијата, која започна во петокот навечер, привремено беа затворени осум аеродроми во Индонезија од безбедносни причини. Во прекините на воздушниот сообраќај биле откажани 2.961 лет, што погодило околу 340.000 патници.
Во меѓувреме, вулканот Анак Кракатау повторно еруптирал трипати утрово, соопштија надлежните за следење на вулканската активност. Иако последните ерупции биле послаби од претходната, и понатаму постои опасност од нови прекини на летовите.
Надлежните предупредуваат дека продолжувањето на воздушниот сообраќај ќе зависи од висината на вулканската пепел и правецот на ветерот.
