По Италија, закани за бомби и во Велика Британија: Над 770 училишта добиле идентични пораки

По масовните закани во Италија, сличен бран заканувачки пораки ја зафати и Велика Британија, каде што повеќе од 770 училишта добиле идентични електронски пораки со закани за поставени бомби. Меѓу нив се 470 училишта во Шкотска и повеќе од 300 во Северна Ирска.

— реклама —

Шкотската полиција соопшти дека единицата за сајбер-криминал и измами спроведува опсежна истрага за да го утврди потеклото на пораките. Полицајците соработуваат и со безбедносните служби во другите делови на Велика Британија, како и со меѓународни партнери. По извршената процена, пораките биле оценети како лажни дојави.

Образовната управа на Северна Ирска соопшти дека заканувачката порака испратена до училиштата има сличности со лажна закана од минатиот месец.

— реклама —

Во пораката се упатуваат закани со зборовите „Ќе ве уништиме“, а испраќачот се потпишал како „Михаил Андропов“. Во електронската порака се наведува и дека е поставена бомба во моторот на автомобилот на британскиот премиер.

— реклама —

Претходно, најмалку 300 училишта во Италија беа евакуирани по добивањето идентични заканувачки пораки, во кои имало и закана упатена до италијанската премиерка Џорџа Мелони. Италијанскиот министер за образование Џузепе Валдитара соопшти дека станува збор за масовни дојави.

Сличен инцидент во Италија се случил и во изминатите денови, кога електронска порака била испратена до адресите на 280 директори на училишта.

— реклама —

Во Европа во последниот период мета на напади и закани поврзани со хибридно војување биле супермаркети, банки за крв, воздушниот сообраќај и телевизиски станици. И дел од заканувачките пораки упатени до телевизии и авиони низ Европа биле потпишани со името Михаил Андропов.