По изјавата на Мицкоски за предвремени избори, ДУИ со јасна порака: „Го бараме тоа“

Изјавата на премиерот Христијан Мицкоски дека е подготвен за предвремени парламентарни избори доколку опозицијата го побара тоа, ДУИ преку соопштение ја оцени како можност за отворање на патот кон ново изборно соочување.

Од партијата велат дека го прифаќаат повикот и бараат најавата на премиерот веднаш да биде преточена во конкретни чекори.

— реклама —

„Го бараме тоа. Конечно и премиерот разбра дека оваа состојба е неодржлива и дека на државата ѝ е потребен нов политички мандат“, наведуваат од ДУИ.

— реклама —

Според партијата, актуелната Влада го загубила легитимитетот да продолжи со, како што велат, европската изолација, влошувањето на меѓуетничките односи, нарушувањето на Охридскиот договор и слабеењето на застапеноста на Албанците во институциите.

Затоа од ДУИ бараат во наредните денови да се утврди најбрзиот уставен рок за одржување на изборите и да започнат потребните подготовки.

— реклама —

„Доколку понудата на премиерот е сериозна, нема причина за одложувања, изговори или политички калкулации“, порачаа од партијата.

Од ДУИ велат дека опозицијата веќе го дала својот одговор и дека се подготвени за избори.

„Да се распушти Собранието. Да се определи датумот. Да одиме на избори“, се наведува во реакцијата.