СДСМ преку соопштение обвини дека германската компанија БМЗ донела одлука да го затвори својот производствен погон во Илинден и производството да го пресели во Полска, при што околу 90 вработени ќе останат без работа, а нема да се реализираат ниту најавените нови вработувања.
Од опозициската партија оценуваат дека ова е трета странска компанија која за краток период одлучила да ја напушти државата, потсетувајќи дека претходно тоа го направиле „Аптив“ и „Дура“, додека, како што наведуваат, „Џонсон Мети“ го намалува бројот на вработени.
Според СДСМ, ова е показател за состојбата во економијата по две години владеење на Владата предводена од Христијан Мицкоски. Од партијата тврдат дека странските инвестиции се намалени, а наместо нови фабрики и работни места, се затвораат производствени капацитети и работниците остануваат без работа.
Во соопштението СДСМ обвинува дека странските инвеститори ја губат довербата во актуелната власт и оценува дека економските политики на Владата не ги даваат очекуваните резултати.
