Премиерот Христијан Мицкоски, соопшти дека процесот на реструктуирање на партијата на ниво на општински комитети е завршен, при што околу 30 проценти од раководните позиции им се доверени на нови луѓе.
Одговарајќи на новинарско прашање, Мицкоски истакна дека кадровските промени имаат за цел не само да придонесат за зајакнување на партијата, туку и за поголема посветеност во работењето во интерес на државата.
„Реструктуирањето на ниво на општински комитети и структура во партијата е завршено. Станува збор за 30-тина проценти нови луѓе, кои што сега добиваат можност да покажат, да работат, не само за партијата, најважно е да работат за државата“, изјави Мицкоски.
Тој најави дека најдоцна до следната недела ќе следува ново кадровско освежување и во останатите партиски структури.
„Покрај новиот состав на Извршниот комитет и новите претседатели на општинските комитети, ќе дојдат и освежувања во другите структури на партијата – Унијата на млади сили, Унијата на жени, Унијата на ветерани и Патриотскиот институт. Остануваат мали финеси кои треба да се доусогласат и очекувам најдоцна следната недела и тоа да го завршиме“, рече лидерот на ВМРО-ДПМНЕ.
Според него, станува збор за процес на внатрешно зајакнување и подмладување на партијата преку вклучување на нови кадри во нејзиното функционирање.
