Спасувачките екипи рано утринава извлекоа жив 43-годишен чувар кој осум дена бил заробен под урнатините на трговски центар по разорните земјотреси што ја погодија Венецуела, пренесува АП.
Хернан Алберто Гил Флорес бил затрупан во подрумот на трговскиот центар „Галеријас Плаја Гранде“ во крајбрежниот регион Ла Гваира од 24 јуни, кога земјата ја погодија два силни земјотреси. Спасувачите првпат воспоставиле контакт со него во саботата, по што започнала сложена операција за негово извлекување.
Во моментот на првиот земјотрес, Гил Флорес бил на работа како ноќен чувар и се наоѓал во мала безбедносна кабина во објектот.
Венецуела на 24 јуни беше погодена од два силни последователни земјотреси со јачина од 7,2 и 7,5 степени според Рихтеровата скала, кои се случија во интервал од само 39 секунди. Најпогодени беа крајбрежната држава Ла Гваира и главниот град Каракас.
По главните потреси следуваа повеќе од 600 последователни земјотреси, а бројот на жртвите досега се искачи на 2.295. Според официјалните податоци, повредени се 11.267 лица, а спасени се 6.461.
Поради катастрофалните последици, привремената претседателка Делси Родригез прогласи седумдневна национална жалост.
