По пораката на Калиопи, се огласи директорот: „Т Арена“ не го замени името „Борис Трајковски“

Директорот на Спортскиот центар „Борис Трајковски“, Данијел Апостолоски, реагираше на изјавата на Калиопи дека за неа арената секогаш ќе остане „Борис Трајковски“, по нејзината денешна прес-конференција на која го најави концертот за 17 октомври.

Апостолоски потенцира дека името „Борис Трајковски“ не е променето и дека така продолжува да се вика целиот спортски центар, додека „Т Арена“ е назив единствено на салата во која се одржуваат концертите.

„Со сета почит кон Калиопи како еден од најдобрите македонски вокали, како директор на СЦ ‘Борис Трајковски’ чувствувам одговорност и должност да дадам објаснување и мислење во однос на нејзината изјава на денешната прес-конференција“, вели Апостолоски.

— реклама —

Тој потсетува дека при официјализирањето на соработката со Македонски Телеком во неколку наврати било потенцирано дека името на спортскиот центар останува непроменето.

„Името на спортскиот центар останува ‘Борис Трајковски’. Тоа е нешто од кое ниту јас ниту кој било може и смее да отстапи. Името на поранешниот претседател е нешто кое со огромна почит и чувство на емпатија го негувам во сите сегменти на функционирањето на спортскиот центар“, вели директорот.

Според него, разликата е во тоа што „Т Арена“ е називот на конкретната сала, а не на целиот комплекс.

— реклама —

„‘Т Арена’ е називот конкретно на салата каде што се одржуваат концертите, што значи не е име на спортскиот центар, кој не е само арена, туку има многу други пропратни елементи и содржини“, објаснува Апостолоски.

— реклама —

Тој директно се осврнува и на ставот на Калиопи, посочувајќи дека не може да се согласи со нејзината констатација.

„Бидејќи сум сигурен дека почитуваната Калиопи одржувала настани во бројни светски спортски и концертни сали, верувам дека повеќето од нив носеле назив на одреден бренд или моментален спонзор, па оттаму не можам да се согласам со нејзината констатација во однос на називот на арената во овој момент“, вели Апостолоски.

Сепак, директорот посочува дека не верува оти зад изјавата на Калиопи имало лоша намера и додава дека Центарот ќе ги обезбеди сите потребни услови за нејзиниот претстоен концерт.

„Верувам дека лоша намера не постои, но сепак менаџирањето и функционирањето на спортскиот центар е нешто кое е наша должност, исто како што имаме должност да ги обезбедиме сите услови за перфектен концерт на Калиопи, кој нѐ очекува во октомври. Се гледаме во ‘Т Арена’ во СЦ ‘Борис Трајковски’!“, порачува Апостолоски.

Реакцијата следува откако Калиопи, на прес-конференцијата за нејзиниот концерт, рече дека за неа салата секогаш ќе остане „Борис Трајковски“.

„За мене арената ќе остане секогаш ‘Борис Трајковски’. Ако сме дале име на наш претседател да го насловиме, тогаш тоа е тоа“, рече Калиопи.