(Видео) Kалиопи го најави големиот концерт: За мене постои само Република Македонија без придавки, арената секогаш ќе биде „Борис Трајковски“

Калиопи на прес-конференција го најави големиот концерт што ќе го одржи на 17 октомври во скопската арена, но дел од нејзиното обраќање беше посветен и на името на државата, како и на новото име на големата сала во Спортскиот центар „Борис Трајковски“.

Големата сала од крајот на јули функционира под името „Т Арена“, по партнерството на Спортскиот центар со Македонски Телеком. Самиот Спортски центар и натаму го носи името на поранешниот претседател Борис Трајковски.

— реклама —

Калиопи, сепак, порача дека за неа арената ќе остане „Борис Трајковски“.

„За мене постои само Република Македонија, без придавки. И она што е многу важно, исто така и самите гледате – за мене арената ќе остане секогаш ‘Борис Трајковски’. Ако сме дале име на наш претседател, да го насловиме, тогаш тоа е тоа“, рече Калиопи.

— реклама —

View this post on Instagram

На прес-конференцијата таа зборуваше и за новата песна „Бебе“, како и за активностите што ѝ претстојат во кариерата, меѓу кои и ангажмани во Загреб.

— реклама —

Најави и дека на скопскиот концерт ќе има специјален гостин, но неговото име засега го чува во тајност. Како што рече, публиката ќе дознае за кого станува збор десетина дена пред концертот.

Калиопи и претходно настапувала пред бројна публика во оваа сала, а на 17 октомври повторно ќе ги изведе хитовите што ја одбележаа нејзината повеќедецениска кариера.

Кристијан Стефановски од „Прагма продукција“ на прес-конференцијата порача дека домашните изведувачи заслужуваат големи концерти и големи сцени.

„Македонската музика заслужува да има големи концерти во големи сали, да биде на исто место и ист пиедестал како сите артисти. Мора да сфатиме дека ако нашето не го сакаме, не може ни туѓото“, рече Стефановски.