Врховниот командант на сојузничките сили на НАТО во Европа, американскиот генерал Алексус Гринкевич, порача дека планираното намалување на бројот на американски војници на континентот нема да ја загрози одбраната на Европа. Во интервју за Politico, тој нагласи дека европските и канадските капацитети се доволни за одговор на секоја потенцијална криза.
Изјавата следи по растечките грижи дека администрацијата на Доналд Трамп подготвува преместување на дел од американските сили во Индо-Пацификот. Првиот чекор веќе беше направен – повлекување 800 војници од Романија, потег кој Букурешт побара да биде ревидиран.
Загриженоста се поклопува со пошироката дебата за посветеноста на Вашингтон кон НАТО. Трамп често предупредува на потребата Европа да ја засили сопствената одбрана, а европските лидери приватно изразуваат скепса околу неговите намери – особено во контекст на војната во Украина и преговорите со Русија. Францускиот претседател Емануел Макрон дури предупреди дека Вашингтон би можел да ја „издаде“ Украина.
Дополнителен немир предизвика и одлуката американскиот државен секретар Марко Рубио да го прескокне состанокот на НАТО министрите, што ретко се случувало од 1949 година. Во исто време, неговиот заменик ги критикувал европските сојузници зад затворени врати поради фокусирање на домашната одбранбена индустрија наместо купување американска опрема.
Генералот Гринкевич инсистира дека овие политички тензии не ја нарушуваат оперативната способност на НАТО. Според него, зголемените трошоци за одбрана во Европа ќе го направат сојузот уште посилен во иднина.
НАТО се соочува со засилени закани од Русија, чиј претседател Владимир Путин оваа недела изјави дека е „подготвен за војна со Европа“. Американскиот генерал предупреди дека Москва би можела да ја тестира колективната одбрана на НАТО во блиска иднина, а руските хибридни напади – кибернетички, саботажи и дезинформации – веќе се реална закана низ континентот.
Тој додаде дека Алијансата размислува и за поофанзивни превентивни мерки: „Ако Русија се обидува да ни создаде дилеми, можеби има начини и ние да создадеме дилеми за нив“, рече без да открие детали.
И додека се води дебата кој треба да ја преземе улогата на врховен командант во иднина – позиција која традиционално ја држат Американци – Гринкевич оценува дека политичарите треба да решат. Американскиот амбасадор во НАТО неодамна порача дека се „радува на денот кога Германија ќе преземе водство“.
Во момент кога Европа се подготвува за можни долгорочни руски закани, НАТО уверува дека останува подготвен – независно од тоа колку американски трупи физички се присутни на теренот.
