По речиси 30 години Македонија добива нов Кривичен законик, предлозите испратени во Европската комисија

Македонија продолжува со обновувањето на казненото законодавство, откако Министерството за правда ги испрати Нацрт-кривичниот законик и Нацрт-законот за кривичната постапка до Европската комисија, од која се очекува мислење за предложените законски решенија.

Со двата нови закона се предвидува модернизирање на правната рамка, зајакнување на борбата против криминалот и корупцијата, поефикасно водење на постапките и подобра заштита на граѓаните. Новиот Кривичен законик се изработува по речиси 30 години, а реформата треба да придонесе и за поголема правна сигурност и поправично судење.

— реклама —

Работата на новиот Кривичен законик започна во 2019 година. Работната група, под раководство на академик Владо Камбовски, во периодот од 2020 до 2026 година ги вклучила во консултациите претставниците на судството, универзитетите, институциите и граѓанските организации. Во предлог-текстот се опфатени 33 директиви на Европската Унија, а биле разгледани и повеќе од 50 забелешки и предлози.

— реклама —

Паралелно се подготвуваше и новиот Закон за кривичната постапка. Работната група од 25 експерти, предводена од професорката Гордана Лажетиќ, ја завршила својата работа во октомври 2026 година. Предложениот закон е усогласен со 25 релевантни европски директиви и стандарди.

Меѓу предвидените новини се поефикасни механизми за конфискација на имот, проширување на можностите за финансиски истраги, употреба на електронски докази и посебни истражни мерки. Предвидени се и решенија за посилна заштита на жртвите, како и одржување судски рочишта и изведување докази на далечина.

— реклама —

Во изработката на законските решенија учествувале и меѓународни партнери, меѓу кои и Мисијата на ОБСЕ во Скопје, која обезбедила значајна поддршка во процесот.

— реклама —

Доставувањето на двата нацрт-закона до Европската комисија е дел од обврските предвидени со Реформската агенда и напорите за усогласување на македонското законодавство со европското право.

Од Министерството за правда посочуваат дека вистинскиот ефект од реформата ќе се мери преку нејзината примена во практиката, односно преку побрзи и поефикасни истраги, правични судски постапки, доследно спроведување на законите и поголема заштита на правата на граѓаните.