По речиси три децении мистерии, теории и неизвесност, случајот со убиството на Тупак Шакур доби судска разрешница. Поранешниот водач на бандата „Саут Сајд Комптон Крипс“, Дуан „Кефе Ди“ Дејвис, е прогласен за виновен за организирање на убиството на легендарниот рапер.
Поротата во Лас Вегас го прогласи 63-годишниот Дејвис за виновен за убиство со употреба на смртоносно оружје. Шакур беше застрелан во престрелка од автомобил на 7 септември 1996 година, а шест дена подоцна им подлегна на повредите. Имаше само 25 години.
Обвинителството тврдеше дека Дејвис не ги испукал смртоносните куршуми, туку го организирал нападот и го обезбедил оружјето. Како можен извршител беше посочен неговиот внук Орландо Андерсон, кој само неколку часа пред пукањето се степал со Шакур и неговата придружба.
Клучен дел од доказите биле сопствените изјави на Дејвис. Тој со години јавно зборувал дека бил во белиот кадилак од кој бил извршен нападот, а за својата улога зборувал и во полициски разговор во 2008 година.
Обвинителот Бину Палал пред поротата тврдеше дека Дејвис бил човекот кој ги издавал наредбите.
Одбраната, пак, се обиде да ги претстави неговите изјави како измислени приказни со кои сакал да заработи од својата книга и медиумските настапи. Адвокатот Мајкл Санфт дури ги повика поротниците да не му веруваат на својот клиент.
Сепак, поротата донесе осудителна пресуда по помалку од три часа советување. Дејвис без видлива реакција ја сослуша одлуката и најави дека ќе поднесе жалба.
Судијката Карли Кирни го закажа изрекувањето на казната за 13 октомври.
Тупак Шакур остана една од највлијателните фигури во историјата на хип-хопот. Во текот на кариерата продал повеќе од 75 милиони албуми, а неговото убиство во Лас Вегас со години беше предмет на бројни теории и шпекулации.
Пресудата против Дејвис претставува прва осудителна пресуда во случајот што речиси 30 години остана нерешен.
