Речиси три децении по убиството на хип-хоп легендата Тупак Шакур, во Лас Вегас денеска започнува судењето против Дуане Дејвис, познат како „Кефи Ди“, кој е обвинет за неговото убиство.
Клучен дел од доказите на обвинителството се неговите сопствени зборови. Дејвис во книгата „Compton Street Legend“, објавена во 2019 година, детално опишал што се случувало во ноќта на 7 септември 1996 година, кога Тупак беше застрелан во Лас Вегас.
Според обвинителството, Дејвис бил водач на групата која тргнала во потрага по Тупак и директорот на „Death Row Records“, Мерион „Суге“ Најт, по претходен конфликт. Тој во книгата напишал дека набавил пиштол, се качил во автомобил со уште тројца мажи и тргнале да ги пронајдат.
Кога го забележале автомобилот во кој се наоѓале Тупак и Најт, им се приближиле. Дејвис подоцна опишал дека тогаш дошло до пукањето, при што Тупак бил смртно ранет, а Најт бил повреден.
Тужителите се повикуваат и на негови претходни изјави дадени пред истражители, како и на интервјуа за документарци и подкасти. Во 2008 година, Дејвис разговарал со федерални истражители во рамките на договор според кој неговите информации, под одредени услови, не можеле директно да се искористат за негово обвинение.
Во тие разговори, тој опишал дека по конфликтот меѓу Тупак и неговиот внук Орландо Андерсон била планирана одмазда. Според неговиот исказ, тој набавил оружје и заедно со Андерсон и уште двајца мажи тргнале да ги пронајдат Тупак и Најт.
Дејвис подоцна продолжил јавно да зборува за случајот. Во 2018 година, во документарец опишал дека истрелите дошле од задното седиште на автомобилот. Една година подоцна, во книгата објавил уште подетална верзија на настаните.
Токму овие јавни изјави сега се меѓу најважните докази на обвинителството. Одбраната, пак, ќе се обиде да покаже дека Дејвис измислувал или преувеличувал за да ја зголеми продажбата на книгата и да привлече внимание.
Дејвис, кој има 63 години, се изјасни дека не е виновен. По апсењето во 2023 година, тој ги оспори своите претходни тврдења и тврдеше дека не го убил Тупак.
Случајот е особено сложен бидејќи нема директен доказ, како оружјето со кое е извршено убиството или снимка од самиот напад. Поради тоа, голем дел од судењето ќе се сведе на прашањето дали може да им се верува на изјавите на Дејвис и кои делови од неговите различни верзии се вистинити.
Дополнителен проблем е што поминаа речиси 30 години од убиството, а дел од потенцијалните сведоци починале, додека сеќавањата на други се избледени.
Изборот на поротата започнува денеска, а судењето се очекува да трае околу еден месец. Доколку биде прогласен за виновен, на Дејвис му се заканува доживотна затворска казна.
