По полноќ српската полиција упадна во зградата на Ректоратот на Универзитетот во Нови Сад, придружена од ректорот Дејан Мадиќ. Според сведоштва на студенти, професори и граѓани, присутните биле собрани во амфитеатарот каде што полицијата им наредила да останат со часови. Студентите објавија дека припадник на жандармеријата нападнал студент кој во живо пренесувал од местото на настанот и му го одзел телефонот. Утринава околу три часот присутните биле пуштени.
Полицијата претходно постави кордони околу Филозофскиот факултет и Факултетот за спорт и физичко образование, користејќи солзавец, шок-бомби и палки за да го растера протестот организиран под мотото „Србијо, дали се слушаме?“. Според Министерството за внатрешни работи, акцијата била потребна поради сознанија дека демонстрантите планирале напад врз полицијата.
Претседателот Александар Вучиќ по акцијата изјави дека полицијата постапила „строго професионално“, притоа најавувајќи дополнителни апсења. Тој соопшти дека биле повредени 11 полицајци и остро ги нападна европските политичари присутни на протестот, нарекувајќи ги „олош“.
Опозицијата жестоко реагираше. Милош Павловиќ од Националното движење на Србија потсети дека според Законот за високо образование полицијата нема право да влегува во факултети без сериозна закана за безбедност. Мариника Тепиќ од ССП го обвини Вучиќ дека „видно алкохолизиран“ ликувал на полициската бруталност, а партијата Србија Центар (СРЦЕ) оцени дека акцијата е „непотребна, брутална и злоупотреба на органите против мирни граѓани“.
Опозициските партии предупредија дека Нови Сад стана симбол на поделби и репресија, а невидениот степен на употреба на хемиски агенси и шок-бомби го нарекоа „намерно труење на граѓаните“.
