Побарал 100.000 евра, а потоа ги нападнал со нож – приведен тетовец

Двајца браќа од тетовското село Пршовце се повредени во напад со нож, откако претходно добиле закани и барање да исплатат 100.000 евра, информира Министерството за внатрешни работи.

— реклама —

Според МВР, на 5 јули во 23:35 часот во СВР Тетово, С.А. (41) и неговиот брат А.С. (42) пријавиле дека околу 21:00 часот, додека С.А. престојувал во угостителски објект, телефонски му се јавил Д.И. (37) од Тетово и му побарал 100.000 евра, при што му упатил закани.

— реклама —

Подоцна, двајцата се сретнале на улицата „120“ пред маркет, каде што Д.И. пристигнал со мотор. Меѓу нив избувнала вербална расправија, која прераснала во физичка пресметка. Во еден момент, според пријавата, Д.И. извадил нож со намера да го нападне С.А., но бил спречен од неговиот брат А.С., кого го ранил. Потоа, со нож го повредил и С.А.

На двајцата повредени им била укажана лекарска помош во Клиничката болница во Тетово.

— реклама —

Истата вечер, во 22:20 часот, осомничениот Д.И. сам се пријавил во Полициската станица во Тетово во врска со настанот, а во 23:20 часот бил лишен од слобода и задржан за понатамошна постапка.

— реклама —

По целосното документирање на случајот, против него ќе биде поднесен соодветен поднесок.