Министерството за правда започнува процес на дигитална трансформација на системот за бесплатна правна помош, со цел граѓаните да добијат побрз, поедноставен и поефикасен пристап до услугите.
Министерот за правда Игор Филков и раководителот на Програмската канцеларија на Советот на Европа во Скопје, Олег Солдатов, потпишаа договор за поддршка на изработката на нов софтвер за бесплатна правна помош, кој ќе овозможи поквалитетно управување со целиот процес.
Со воведувањето на новото дигитално решение, постапките ќе станат побрзи, поедноставни и потранспарентни. Софтверот ќе овозможи поефикасно управување со предметите, побрза обработка на барањата и подобра координација меѓу институциите и давателите на бесплатна правна помош.
За граѓаните, ова ќе значи полесен пристап до услугите, поголема достапност на информации и поедноставно остварување на правото на бесплатна правна помош.
Од Министерството за правда посочуваат дека со овој проект дополнително ќе се зајакне пристапот до правда и ќе се обезбеди подобра заштита на правата на сите граѓани.
Активноста се реализира со поддршка на Советот на Европа и претставува значаен чекор кон воспоставување современ, ефикасен и целосно дигитализиран систем на бесплатна правна помош во државата.
