Побрзи депортации и задолжителна солидарност: Што носи новиот миграциски пакт на ЕУ?

Европската Унија од денеска официјално започнува со примена на Пактот за миграција и азил – сеопфатен пакет закони што треба да воспостави нови правила за управување со миграцијата, контролата на надворешните граници и постапките за доделување азил.

— реклама —

Претседателката на Европската комисија, Урсула фон дер Лајен, оцени дека новиот систем ќе донесе „побезбедни надворешни граници, солидарност меѓу земјите членки и поефикасни постапки за азил и враќање на илегалните мигранти“.

Пактот опфаќа 10 законодавни акти за кои се преговараше осум години. Еден од неговите клучни елементи е механизмот на задолжителна солидарност, според кој земјите членки ќе треба да им помогнат на државите што се под најголем миграциски притисок. Помошта може да биде преку прифаќање баратели на азил, финансиски придонеси или техничка и оперативна поддршка.

— реклама —

Новите правила предвидуваат и побрзи процедури на надворешните граници на ЕУ. Лицата што доаѓаат од земји со ниска стапка на одобрување азил ќе бидат предмет на забрзани постапки, кои ќе траат најмногу 12 недели, по што, доколку барањето биде одбиено, ќе следува нивно враќање во матичната земја.

— реклама —

Се воведува и задолжителна регистрација и безбедносна проверка на сите нерегуларни мигранти, како и поефикасно користење на базата на податоци „Еуродак“ за проверка на идентитетот.

И покрај тоа што Европската комисија го претставува Пактот како историски исчекор кон поефикасен миграциски систем, тој останува предмет на критики. Десничарските партии сметаат дека мерките не се доволно строги, додека организациите за човекови права предупредуваат дека постои ризик од ограничување на правата на бегалците.

Европскиот комесар за внатрешни работи и миграција, Магнус Брунер, порача дека не треба да се очекува системот да функционира совршено уште од првиот ден, но оцени дека Пактот претставува значаен чекор кон воспоставување поодржлив и покоординиран европски одговор на миграциските предизвици.