Вчерашните долги колони на граничниот премин Табановце, создадени откако почна проверката и наплатата на казни за странски возачи со прекршоци евидентирани од „Сејф сити“, предизвикаа лавина реакции на социјалните мрежи.
Најголемиот дел од коментарите не ја оспоруваат потребата да се санкционираат возачите кои ги прекршиле сообраќајните правила. Револтот, сепак, е насочен кон начинот на кој е организирана проверката и фактот што во колоните со часови чекале и возачи кои, како што самите тврдат, немале направено никаков прекршок.
„Вечерва беше пекол на граничниот премин и неколку километри пред него. Не е спорна наплатата на казните, туку местото и начинот на кој се вршат проверката и наплатата. Повеќе од три часа чекање во непрегледна колона возила“, пишува една од корисничките.
Друг возач вели дека чекал дури пет часа и прашува зошто последиците од новиот систем треба да ги чувствуваат и оние кои ги почитувале правилата.
„Сè е тоа супер, ама зошто јас да чекам пет часа ако сум го почитувал ограничувањето? Зошто моето семејство да страда додека чека несовесните да ја платат казната?“, стои во еден од коментарите.
Слична е и забелешката на друг корисник, кој ја поддржува наплатата, но смета дека мора да има посебно место каде ќе бидат тргнати возачите со прекршоци, за останатите непречено да го продолжат патувањето.
„Супер е да се плаќаат казните, но што е со луѓето кои ги почитувале ограничувањата? Сега сите треба да чекаат на граница“, реагира тој.
Дел од коментарите одат чекор понатаму и го критикуваат и поставувањето на камерите и ограничувањата на одредени делници. Еден возач тврди дека на патот кон Грција има камери поставени веднаш по делови со пониско ограничување, што, според него, создава впечаток дека системот е насочен кон наплата, а не кон безбедност. Станува збор за лично тврдење од коментар и засега нема официјална потврда за ваквите наводи.
Има, пак, и корисници кои целосно го поддржуваат новиот начин на санкционирање.
„Досега казни добиваа само возилата со македонски таблици. Кој вози по правилата нема да има проблем“, гласи еден од коментарите, додека друг кратко порачува: „Добро е што почнаа“.
Меѓу реакциите има и совети до возачите да користат навигациски апликации кои предупредуваат за камерите, но и најави од дел од патниците дека по вчерашното искуство во иднина би размислиле за друга транзитна рута кон Грција.
Заедничката порака во голем дел од реакциите е дека санкционирањето на прекршителите е оправдано, но дека проверката треба да биде организирана така што возачите без прекршок нема со часови да остануваат заглавени во иста колона.
Како што објави „Скопје1“, вчера на Табановце беа проверувани странски регистарски таблички за прекршоци претходно евидентирани од „Сејф сити“, а околу стотина странски возачи биле запрени поради регистрирани прекршоци. Токму примената на новиот механизам донесе големи колони на излезот од Македонија.
