Македонската култура остана без еден од своите најпрепознатливи и најпочитувани уметници. По подолго боледување, синоќа, на 75-годишна возраст, почина легендарниот театарски, филмски и телевизиски актер и хуморист Гоце Тодоровски.
Тажната вест ја соопшти неговата ќерка Сашенка преку социјалните мрежи.
„Го изгубивме… По голема борба го напушти овој свет. Лесна ти земја, татко мој, вечен непребол. Душата не умира, а телото е премногу истрошено сега. Летај со ангелите“, напиша таа.
Гоце Тодоровски е роден на 30 април 1951 година во Кичево. По дипломирањето на Факултетот за драмски уметности при Универзитетот „Св. Кирил и Методиј“ во Скопје, во класата на професорот Илија Џувалековски, ја започнал својата професионална кариера во Драмскиот театар во Скопје, каде што брзо се наметнал како исклучително талентиран актер и суптилен комичар.
Во текот на својата богата кариера настапуваше во бројни театарски претстави, телевизиски серии, филмови и хумористични радиоемисии, оставајќи неизбришлива трага во македонската уметност. Соработуваше со врвни македонски режисери, меѓу кои Слободан Унковски, Коле Ангеловски, Димитар Станковски, Владимир Милчин и Димитрие Османли.
Публиката ќе го памети по незаборавните улоги во сериите „Македонски народни приказни“, „Итар Пејо“, „Бушава азбука“, „Трст виа Скопје“, „Солунски патрдии“, „Хихирику“, „Балкан бенд“, „Чук, чук, Стојанче“, „Булки кај шините“ и многу други, како и по улогите во филмовите „Шеќерна приказна“, „Учителот“, „Тетовирани души“, „Среќна Нова ’49“, „Викенд на мртовци“, „Бол“, „Женски оркестар“ и „Црвениот коњ“.
За својот исклучителен придонес во македонската култура беше добитник на бројни признанија. Минатата година му беше доделена државната награда „23 Октомври“ за достигнувања во областа на културата и уметноста, а во 2023 година тогашниот претседател Стево Пендаровски го одликува со Орден за заслуги за исклучителниот придонес во развојот, популаризацијата и афирмацијата на театарската уметност.
Со заминувањето на Гоце Тодоровски, Македонија изгуби еден од своите најголеми актери, чие богато творештво и незаборавни улоги ќе останат трајно врежани во колективната меморија на македонската публика.
