Почина поранешен функционер на ДЗС, обвинет за трагедијата во „Пулс“

Обвинението за трагедијата во дискотеката „Пулс“ во Кочани остана без уште еден од обвинетите, откако почина Љупчо Грнчиштанов (54), поранешен генерален инспектор и раководител на Инспекциската служба во Дирекцијата за заштита и спасување.

— реклама —

Според информациите, Грнчиштанов починал откако му се слошило во домашни услови. За случајот е известено Јавното обвинителство, а Основното јавно обвинителство – Скопје ќе издаде наредба за обдукција со цел да се утврдат причините за смртта.

Грнчиштанов беше меѓу обвинетите во предметот поврзан со пожарот во дискотеката „Пулс“ и се товареше за кривичното дело „Тешки дела против општата сигурност“.

— реклама —

Во периодот од 2013 до март 2025 година тој ја извршувал функцијата генерален инспектор и раководител на Инспекциската служба во Дирекцијата за заштита и спасување.

— реклама —

Според достапните информации, поминал 77 дена во ефективен притвор, по што мерката му била заменета со куќен притвор, во кој се наоѓал речиси 14 месеци.

Ова е втор смртен случај меѓу лицата опфатени со истрагата и обвинението за трагедијата во Кочани. Претходно почина и Владо Петров, пензиониран полициски службеник кој беше осомничен во истрагата.

Судската постапка за трагедијата во „Пулс“ продолжува, додека јавноста и семејствата на жртвите очекуваат целосно утврдување на одговорноста за еден од најтрагичните настани во поновата македонска историја.