Во Анкара денеска започнува дводневниот самит на НАТО, на кој ќе се соберат лидерите на сите 32 земји членки на Алијансата. На агендата ќе доминираат прашањата за зголемување на издвојувањата за одбраната, продолжување на поддршката за Украина, јакнење на одбранбената индустрија и актуелните безбедносни случувања на Блискиот Исток.
Една од главните цели на европските сојузници ќе биде да покажат дека ги исполнуваат барањата на САД за поголеми инвестиции во одбраната, но и дека се подготвени дополнително да ги зајакнат своите воени капацитети и производството на оружје.
Во рамки на самитот е најавена и средба меѓу американскиот претседател Доналд Трамп и украинскиот претседател Володимир Зеленски. Се очекува двајцата лидери да разговараат за состојбата во Украина, текот на војната и можните чекори за постигнување мир.
Според дипломатски извори, лидерите на НАТО ќе потврдат дека европските членки и Канада значително ги зголемиле вложувањата во одбраната во текот на оваа година. Воедно, се очекува да биде најавен и нов пакет воена помош за Украина, со кој ќе продолжи поддршката за Киев и во наредниот период.
Покрај средбата со Зеленски, Трамп ќе разговара и со турскиот претседател Реџеп Таип Ердоган, домаќин на самитот, а според најавите ќе има и средба со сирискиот претседател Ахмад ал-Шара.
Турција, пак, ќе настојува да постигне напредок во одбранбената соработка со западните партнери, вклучително и околу системот SAMP/T, како и да обезбеди укинување на американските санкции и враќање во програмата за борбените авиони Ф-35.
Безбедносната состојба на Блискиот Исток, особено тензиите околу Ормутскиот Теснец и иранската нуклеарна програма, исто така ќе бидат меѓу темите на лидерската средба.
Паралелно со самитот ќе се одржи и форум на одбранбената индустрија, каде што се очекува да бидат објавени нови договори за вооружување вредни десетици милијарди долари, а министрите за надворешни работи и за одбрана ќе одржат посебни состаноци со партнерските држави од Блискиот Исток и Индо-Пацификот.
