Поддршката за американскиот претседател Доналд Трамп меѓу белите гласачи падна на најниско ниво откако повторно ја презеде функцијата, покажува најновото истражување на CNN и агенцијата SSRS.
Според анкетата, нето рејтингот на Трамп меѓу белите гласачи изнесува минус 20 процентни поени, што е најнизок резултат забележан во текот на неговиот мандат.
Вкупно 34 проценти од испитаниците го одобруваат неговото работење, додека 66 проценти изразиле незадоволство. Со тоа, Трамп го достигнал најниското ниво на поддршка во својата политичка кариера, еднакво на она по настаните во американскиот Конгрес во јануари 2021 година.
Истражувањето покажува дека граѓаните се најнезадоволни од начинот на кој администрацијата се справува со економијата, инфлацијата, цените на горивата и политиката кон Иран. Само 25 проценти ја одобруваат неговата политика за инфлацијата, 21 процент за цените на горивата, а 28 проценти за односот кон Иран.
Околу две третини од анкетираните сметаат дека економските политики на Трамп ја влошиле состојбата во американската економија, а исто толкав дел оценуваат дека неговите воени одлуки поврзани со Иран им наштетиле на интересите на САД.
Анкетата покажува и дека 73 проценти од Американците сметаат оти Трамп не посветува доволно внимание на најважните проблеми во земјата, додека само 27 проценти веруваат дека неговите приоритети се правилно поставени.
Пад на поддршката е забележан и меѓу републиканските гласачи. Одобрувањето за Трамп во рамките на Републиканската партија изнесува 78 проценти, што е најниско ниво во неговиот актуелен мандат.
Од Белата куќа ги отфрлија резултатите од анкетата, оценувајќи дека ниту еден американски претседател не направил повеќе за граѓаните од Доналд Трамп и дека администрацијата продолжува да работи на отворање нови работни места, намалување на инфлацијата и подобрување на животниот стандард.
Истражувањето на CNN и SSRS е спроведено од 23 до 27 јули на примерок од 1.225 возрасни лица во САД, со статистичка маргина на грешка од плус или минус 3,2 процентни поени.
