Полицаец наплаќал казни за непрописно паркирање во кеш наместо преку пос-терминал, а парите ги ставал во џеб: заработил 85.000 денари

Јавен обвинител од Основното јавно обвинителство за гонење организиран криминал и корупција води постапка против полициски службеник од Одделението за безбедност на сообраќајот при СВР Скопје, осомничен за продолжено кривично дело злоупотреба на службената положба и овластување.

— реклама —

Според Обвинителството, во периодот од април до јули годинава, осомничениот ја злоупотребувал службената положба, при што за себе и за други лица прибавил противправна имотна корист, а на државниот буџет му нанел штета од најмалку 85.500 денари.

— реклама —

Истрагата покажала дека, додека работел во депото на ЈП „Градски паркинг“, за дел од возачите чии возила биле подигнати со пајак-служба, изготвувал прекршочни налози, но наместо казната да се плати преку ПОС-терминал, парите ги земал во готово и ги задржувал за себе. Притоа користел потврди за плаќање од претходно извршени трансакции.

— реклама —

Во други случаи, според Обвинителството, изрекувал помали казни од законски предвидените или воопшто не изготвувал прекршочни налози, дозволувајќи им на возилата да го напуштат депото без да биде наплатена глоба.

Поради опасност од бегство, повторување на делото и можност за влијание врз сведоци, обвинителот побарал определување притвор. Судијата на претходна постапка го прифатил предлогот и на осомничениот му одредил притвор во траење од осум дена.