Полицајците ќе можат да носат брада и тетоважи: МВР ги менува правилата

Полициските службеници во Македонија отсега ќе можат да носат уредна брада и одредени видови тетоважи, откако Министерството за внатрешни работи направи измени во Правилникот за однесување и меѓусебни односи на работниците во МВР.

Од Министерството информираат дека Правилникот бил донесен на 4 мај годинава, а по иницијатива на Гранскиот независен синдикат на полицијата биле предложени измени кои се однесуваат на изгледот на полициските службеници. По разгледување на предлогот, МВР ги прифатило измените и на 1 јуни биле усвоени дополнувањата.

— реклама —

Според новите правила, полициските службеници кои носат униформа ќе можат да имаат брада, но таа мора да биде кратка, уредна и редовно одржувана, без да го нарушува професионалниот изглед на службеникот.

— реклама —

„Брадата мора да биде чиста, негувана и редовно одржувана, со јасно дефинирани контури на образите и вратот, а не смее да ја попречува употребата на службената опрема, вклучително и заштитната маска“, стои во Правилникот.

Измените се однесуваат и на тетоважите. Според новите одредби, униформираните полицајци нема да смеат да имаат видливи тетоважи на деловите од телото кои се изложени при носење униформа, освен на горните екстремитети. Притоа, тетоважите не смеат да содржат навредлива, расистичка или вулгарна содржина што би можела да го наруши угледот на Министерството.

— реклама —

Информацијата ја потврди и Независниот синдикат на полицијата, од каде оценуваат дека станува збор за значаен чекор кон модернизација на условите за работа и усогласување со практиките што веќе се применуваат во голем број европски држави.

— реклама —

Покрај овие измени, прифатен е и предлогот за укинување на ограничувањата за користење мобилни телефони кај дел од полициските служби.

Од МВР велат дека со измените се постигнува рамнотежа меѓу современите потреби на полициските службеници и зачувувањето на стандардите за професионалност, дисциплина и углед на полициската служба.