Полицајците од Пробиштип не знаеле дека ќе учествуваат во контрола на дискотеката „Пулс“, тврди сведок на судењето

Полициските службеници Мартин Арсовски и Дарко Милошевски не биле однапред информирани дека ќе учествуваат во контрола на дискотеката „Пулс“, ниту им биле дадени конкретни задачи за постапувањето во Кочани. Ова го изјави Драган Василески, виш инспектор за економски криминалитет во ОВР Пробиштип, кој денеска сведочеше на судењето за пожарот во дискотеката.

— реклама —

Василески посочи дека на 14 март 2026 година добил наредба од тогашниот началник на ОВР Пробиштип да предложи двајца инспектори за ангажман на подрачјето на ОВР Кочани следната вечер. Според неговото сведочење, ниту тој ниту Арсовски и Милошевски не знаеле какви активности ќе извршуваат. Им било кажано во 20:30 часот да пристигнат со службено возило на бензинска пумпа во Кочани, каде што требало да ги пречекаат локални полициски службеници.

Тој нагласи дека инспекторите не добиле наредба да носат униформи, не биле запознаени со можните ризици и не учествувале во подготовката на акцијата. Додаде и дека пред трагедијата воопшто не слушнал за дискотеката „Пулс“.

— реклама —

Според информациите што подоцна ги добил од колегите, околу 2:30 часот по полноќ Арсовски и Милошевски, заедно со полицајци од ОВР Кочани, влегле во објектот за да проверат лице за кое постоело сомнение дека поседува наркотични средства. При проверката била пронајдена материја за која се сомневале дека е дрога. Инспекторите му раскажале дека проверката се одвивала во близина на тоалетите, а при излегувањето забележале дека гостите почнуваат да го напуштаат објектот и настанува метеж.

— реклама —

Во паузата од рочиштето, во име на родителите на загинатите се обрати Александар Наунов, кој рече дека секое судско рочиште за семејствата претставува повторно преживување на трагедијата. Тој изрази незадоволство од сведочењата, посочувајќи дека постојано се споменуваат усни наредби, недоволна информираност и префрлање на одговорноста.

Наунов праша дали акција може да се смета за професионално спроведена без соодветна информираност и координација меѓу полициските служби, како и дали подобра организација и навремено постапување можеле да спасат животи.

— реклама —

Во пожарот што избувна на 16 март 2025 година во дискотеката „Пулс“ во Кочани загинаа 63 лица, а повеќе беа повредени. Во предметот се обвинети 13 полициски службеници. Обвинителството тврди дека тие не постапиле согласно со службените обврски и акцискиот план поврзан со работата на дискотеката.