Полицијата доби 33 нови мотоцикли и комплетна опрема за контрола на сообраќајот

Со 33 нови полициски мотоцикли и исто толку комплети мотоциклистичка опрема се зајакнуваат капацитетите на сообраќајната полиција. Опремата е обезбедена од Републичкиот совет за безбедност на сообраќајот на патиштата (РСБСП), а денеска официјално им беше предадена на Министерството за внатрешни работи.

Министерот за внатрешни работи, Панче Тошковски, и претседателот на РСБСП, Горан Ангеловски, присуствуваа на примопредавањето на новата опрема. Станува збор за мотоцикли „Piaggio Beverly 310 HPE“ во полициска изведба, заедно со заштитни кациги, јакни, панталони, чизми и летни и зимски ракавици.

— реклама —

Вкупната вредност на набавката изнесува 16.845.561 денари. Според надлежните, новата опрема ќе овозможи поголема мобилност и поефикасно регулирање и контрола на сообраќајот, како и подобри услови за работа на полициските службеници.

Тошковски оцени дека набавката е конкретен резултат на соработката меѓу МВР и РСБСП, со заедничка цел – унапредување на безбедноста во сообраќајот и намалување на бројот на сообраќајни незгоди и жртви.

— реклама —

„Денеска не зборуваме само за 33 нови мотоцикли и опрема, туку за дополнително зајакнување на капацитетите на сообраќајната полиција и за уште еден чекор кон побезбедни патишта. Ова е пример како треба да функционира меѓуинституционалната соработка – со конкретни проекти и резултати што граѓаните ќе ги почувствуваат“, истакна Тошковски.

Тој нагласи дека модернизацијата на сообраќајната полиција е дел од поширокиот пристап на МВР за унапредување на сообраќајната безбедност, во кој значајно место има и системот „Безбеден град“.

Според Тошковски, резултатите од системот во намалувањето на бројот на сообраќајни незгоди, повредени и загинати лица се дополнителен мотив за продолжување на активностите. Тој порача дека зад секоја статистика стои човечки живот и дека целта на сите мерки е да се спасат што повеќе животи.

— реклама —

Претседателот на РСБСП, Горан Ангеловски, посочи дека Советот и оваа година издвојува средства за модернизација и опремување на организациските единици на МВР задолжени за контрола и регулирање на сообраќајот.

Тој оцени дека набавката на мотоциклите и комплетната опрема значително ги зајакнува капацитетите за сообраќајна контрола и претставува уште еден пример за меѓуинституционална соработка.

— реклама —

Тошковски и Ангеловски ја потврдија определбата за продолжување на соработката меѓу МВР и РСБСП преку нови инвестиции, превентивни активности и проекти насочени кон подигнување на сообраќајната култура.

Крајната цел, како што беше посочено, е намалување на бројот на сообраќајни незгоди, повредени и загинати лица и создавање побезбедни услови за сите учесници во сообраќајот.