Полицијата на истокот на Демократска Република Конго пукала во воздух за да растера разгневена толпа која се обидела да ги преземе телата на починати од ебола во центар за лекување во градот Монгвалу.
Според Би-би-си, немирите започнале во неделата и траеле во текот на целиот ден, а центарот за лекување претходно бил нападнат и запален.
Медицинскиот директор на болницата во Монгвалу, Ричард Локуди, изјавил дека демонстрантите барале телата на две починати лица да им бидат предадени на семејствата.
Една од жртвите бил католички свештеник и познат локален верски лидер, а здравствените власти предупредуваат дека телата на жртвите од ебола се исклучително заразни и можат дополнително да го шират вирусот при традиционални погреби.
Поради тоа, погребите ги организира Црвениот крст под полициска заштита, што предизвикува недоверба и револт кај дел од локалното население.
Во тековната епидемија досега се регистрирани повеќе од 900 сомнителни случаи и над 220 сомнителни смртни случаи.
Уганда во меѓувреме потврди уште два нови случаи на ебола кај здравствени работници, со што бројот на заразени во земјата се искачи на седум.
Африканскиот центар за контрола и превенција на болести предупреди дека повеќе африкански држави се изложени на ризик од ширење на епидемијата, додека Светската здравствена организација соопшти дека ситуацијата е дополнително комплицирана бидејќи станува збор за редок вид на вирусот ебола за кој во моментов нема вакцина.
