Полицијата затекна пет возачи без дозвола во Прилепско и Кривогаштанско, меѓу нив и малолетник

Пет лица, меѓу кои и еден малолетник, биле лишени од слобода во одделни сообраќајни контроли спроведени на подрачјето на Прилеп и Кривогаштани, откако било утврдено дека управувале мопеди без да поседуваат возачка дозвола.

— реклама —

Според информациите од СВР Битола, на 18 јуни во 13:15 часот во селото Обршани, полициски службеници од Полициското одделение Кривогаштани ги лишиле од слобода А.Е. (18) од селото Воѓани и Б.К. (18) од селото Крушеани. При сообраќајни контроли било утврдено дека двајцата управувале мопеди без да имаат возачка дозвола.

— реклама —

Истовремено, во Прилеп биле приведени уште три лица. На улицата „Александар Македонски“ во 14:40 часот бил лишен од слобода М.М. (18) од Прилеп, а десет минути подоцна на истата улица бил приведен и 15-годишен малолетник. Во двата случаи било констатирано дека управувале мопеди без положен возачки испит.

— реклама —

Во 15:10 часот во селото Канатларци, прилепско, полициски службеници го лишиле од слобода и Е.И. (38) од истото село, кој исто така бил затекнат како управува мопед без возачка дозвола.

— реклама —

Од полицијата информираат дека по целосно документирање на сите случаи ќе бидат поднесени соодветни поднесоци против лицата.