Полициски службеници во текот на изминатото деноноќие спроведоа повеќе акции на подрачјето на Скопје, Тетово, Кичево и Струга, при што од слобода биле лишени вкупно 11 лица кај кои била пронајдена дрога.
Во Скопје, на повеќе локации, полициски службеници од СВР Скопје ги привеле Г.А. (30), В.С. (26) и Љ.С. (25), сите од Скопје, кај кои биле пронајдени и одземени марихуана, бела прашкаста материја и ризли.
Во истиот ден, од Казнено-поправната установа Затвор Идризово било пријавено дека при контрола на осуденикот И.Т. (43) од Скопје, кој се враќал од отсуство, биле пронајдени бела прашкаста материја и таблети.
Во Струга, полициски службеници го лишиле од слобода Ц.В. (18) од селото Ташмаруништа, откако при преглед кај него биле пронајдени марихуана и други предмети.
Во Кичево, при контрола на патничко возило „Форд“ со скопски регистарски ознаки, биле приведени М.Т. (24), Б.В. (25) и О.К. (25), сите од Скопје. При прегледот биле пронајдени и одземени марихуана и други предмети.
Во тетовско Боговиње, полициски службеници ги лишиле од слобода Г.Ќ. (29) и И.М. (28) од селото Милетино, откако при преглед на возило „Поло“ била пронајдена бела прашкаста материја.
Дополнително, во близина на клучката Групчин бил приведен и 17-годишен малолетник од селото Копачиндол, кај кого била пронајдена марихуана.
Од МВР информираат дека по целосното документирање на сите случаи против лицата ќе бидат поднесени соодветни поднесоци.
