Во текот на изминатото деноноќие, полициските службеници низ државата лишиле од слобода вкупно 23 возачи поради безобѕирно управување со возила, при што дури 21 лице управувале без возачка дозвола, а меѓу нив имало и тројца малолетници.
Според информациите од Министерството за внатрешни работи, осум лица биле приведени во Скопје, од кои едно било малолетно. Во Гостивар биле лишени од слобода четири лица, меѓу кои исто така имало еден малолетник, додека во Кичево биле приведени двајца возачи.
По едно лице без возачка дозвола било затекнато во Тетово, Куманово, Кочани, Валандово, Битола и Прилеп, а во Неготино бил приведен уште еден малолетник.
Дополнително, по едно лице во Битола и Штип било лишено од слобода поради управување возило под дејство на алкохол.
Од МВР информираат дека по целосното документирање на сите случаи ќе бидат поднесени соодветни кривични пријави против сторителите.
Воедно, од Министерството апелираат до сите учесници во сообраќајот да ги почитуваат сообраќајните правила и прописи, да не седнуваат зад волан без положен возачки испит, доколку имаат изречена забрана за управување или доколку се под дејство на алкохол, со цел сите заеднички да придонесат за побезбеден сообраќај.
