Полициски службеник, преку мобилна апликација споделувал службени тајни

Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до Основното јавно обвинителство за гонење на организиран криминал и корупција против полицискиот службеник Б.Т. поради сомнение за сторено кривично дело „оддавање службена тајна“.

— реклама —

Според информациите од МВР, пријавениот, кој бил вработен во Надворешната канцеларија за криминалистички работи Прилеп, на 16 мај 2025 година, при извршување службени задачи и преземање полициски овластувања во врска со пријавено кривично дело, се стекнал со податоци што претставувале службена тајна во предистражна постапка.

— реклама —

Како што информираат од Министерството, три дена подоцна, на 19 мај 2025 година, при приватна комуникација преку мобилна апликација, тој ги споделил добиените информации со бранител на осомничен во постапката.

— реклама —

Споделените податоци, според МВР, се однесувале на искази дадени од лица лишени од слобода на кои им била определена мерка притвор, како и на информации поврзани со издадени наредби за приведување на лице.

— реклама —

Против Б.Т. е поднесена соодветна кривична пријава, а за случајот ќе постапува надлежното обвинителство.