„Политичка хистерија“: ВМРО-ДПМНЕ го нападна Филипче по критиките за дата-центрите

ВМРО-ДПМНЕ реагираше на соопштението на СДСМ за евентуалната изградба на дата-центри во Македонија, обвинувајќи го претседателот на СДСМ, Венко Филипче, дека секоја нова инвестиција ја претвора во повод за ширење страв и паника во јавноста.

Од партијата велат дека СДСМ нема аргументи против ваквите проекти, па затоа, според нив, секоја нова инвестиција се претставува како закана.

— реклама —

„Филипче и СДС изгледа имаат проблем со сè што може Македонија да ја направи помодерна, посилна и поконкурентна држава“, наведуваат од ВМРО-ДПМНЕ.

Во реакцијата се споменува и Пехчево, при што од партијата тврдат дека иницијативата против дата-центрите таму не поминала и дека зад неа стоел човек близок до СДСМ.

— реклама —

„Кога ни тоа не успеа, следуваше ново ширење паника во јавноста“, велат од ВМРО-ДПМНЕ.

Партијата оценува дека Македонија треба да се развива, да привлекува инвестиции и да создава модерна инфраструктура, но притоа нагласува дека тоа треба да се прави со почитување на законите, заштита на животната средина и примена на високи стандарди за заштита на граѓаните.

— реклама —

„Македонија треба да се развива, да привлекува инвестиции, да создава модерна инфраструктура и да станува современа и богата држава“, се наведува во соопштението.

Од ВМРО-ДПМНЕ тврдат дека Филипче и СДСМ наместо стручни анализи и аргументирана дебата нудат „обиди секоја можност за развој да се претвори во нова причина за страв и паника“.

„На Македонија ѝ треба развој и визија, не политичката хистерија на Венко Филипче, секогаш кога нешто може да ја направи помодерна и посилна“, порачуваат од ВМРО-ДПМНЕ.

Реакцијата доаѓа откако СДСМ побара целосна транспарентност за разговорите со потенцијални инвеститори за дата-центри, со прашања за тоа кои компании се во игра, под кои услови се водат разговорите и колкава би била потрошувачката на вода и електрична енергија.