Новиот унгарски премиер Петер Маѓар одби да ја потпише документацијата за исплата на законски предвидените отпремнини за министрите од поранешната влада на Виктор Орбан, предизвикувајќи политички судир во Унгарија.
Маѓар соопшти дека вкупниот фонд за отпремнини, вреден речиси една милијарда форинти или околу 2,6 милиони евра, нема да биде исплатен на поранешните функционери, туку ќе биде пренасочен во хуманитарни цели.
Во објава на „Фејсбук“, тој директно го нападна Орбан.
„Според неговата имотна состојба, Виктор Орбан, кој на хартија речиси ништо не поседува, би имал право на отпремнина од 38 милиони форинти, односно околу 105.000 евра, според закон што самиот го воведе – за пљачкање на нашата земја. Нема да ја добие“, напиша Маѓар.
Тој ги повика и поранешните министри да не помислуваат да ги земат отпремнините.
„Со оглед на состојбата во која ја оставија земјата, најмалку што можат да направат е да не земат десетици милиони форинти отпремнина“, порача новиот премиер.
Изјавата дека Орбан „на хартија не поседува речиси ништо“ се однесува на долгогодишните критики во Унгарија дека поранешниот премиер официјално прикажувал минимален имот, додека луѓе блиски до него енормно се збогатувале.
Особено често се споменува неговиот пријател од детството Лоринц Месарош, поранешен инсталатер на гас, кој од 2010 година, благодарение на државни договори, стана најбогат човек во Унгарија со богатство проценето на околу 3,1 милијарди евра.
Месарош еднаш изјави дека за неговиот успех биле заслужни „Бог, среќата и Виктор Орбан“.
„Фајненшл тајмс“ уште во 2017 година го спореди унгарскиот политичко-бизнис круг со руските олигарси, оценувајќи дека системот функционира како „неофеудален клиентелизам“.
По критиките од новата власт, поранешните министри од Фидес соопштија дека отпремнините ќе ги донираат во Детскиот дом „Добар Самарјанин“ во Закарпатската област во Украина, каде живее бројна унгарска етничка заедница.
Набргу потоа и Орбан објави дека својата отпремнина ќе ја донира на истата институција.
Во писмо до директорот на домот, Орбан навел дека донира 38,8 милиони форинти.
Истовремено, новата влада на Маѓар прави остар пресврт и во надворешната политика. Маѓар веќе го повикал рускиот амбасадор на разговор по масовен руски напад со дронови во близина на унгарската граница, што претставува значително отстапување од блиските односи што Орбан ги имаше со Москва.
Дополнително, Маѓар предупреди дека олигарси блиски до Орбан префрлаат десетици милијарди форинти во Обединетите Арапски Емирати и други држави и побара замрзнување на тие трансфери.
И власта и опозицијата во Унгарија сега се обидуваат да покажат грижа за унгарското малцинство во украински Закарпатје, но со сосема различни политички пораки и цели.
