СДСМ преку соопштение ја обвини Владата дека со своите политики ги остава граѓаните да чекаат со часови на граничните премини, додека, според партијата, функционерите уживаат во привилегии.
Од СДСМ тврдат дека додека премиерот Христијан Мицкоски, како што наведуваат, го користи државниот авион за патувања, граѓаните со своите семејства чекаат со часови во долги колони на граничните премини, изложени на високите температури.
Во соопштението се наведува дека дел од функционерите на ВМРО-ДПМНЕ и нивните семејства поседуваат бугарски пасоши и други европски документи, поради што, според СДСМ, имаат полесен пристап при патувањата низ Европската Унија.
Партијата оценува дека Владата не води сметка за интересите на граѓаните, туку, како што тврди, е насочена кон сопствените привилегии и тендери.
„Додека народот стои во колони, тие летаат. Додека децата седат во прегреани автомобили, тие уживаат во привилегиите што си ги обезбедија. Ова е нивна политика – изолација за народот, Европа за себе“, се наведува во соопштението на СДСМ.
