„Политико“: Трамп ја притисна Европа со забрана за извоз на дизел – Г7 на крајот ослободи 100 милиони барели

Администрацијата на американскиот претседател Доналд Трамп извршила силен притисок врз европските сојузници да ослободат дизел и нафта од стратешките резерви, предупредувајќи дека во спротивно САД би можеле да го ограничат извозот на дизел. По неколкудневни тензични разговори, земјите од Г7 се согласија да пуштат 100 милиони барели од резервите во следните четири месеци.

„Политико“, повикувајќи се на десет претставници на нафтената индустрија и европски владини функционери запознаени со разговорите, пишува дека американскиот притисок предизвикал незадоволство меѓу европските партнери, а дел од соговорниците пристапот на Вашингтон го опишале како „уцена“.

Одлуката на Г7 предвидува координирано ослободување на 100 милиони барели нафта и нафтени деривати преку Меѓународната агенција за енергија во период од четири месеци. Значителна количина дизел треба да биде пуштена на пазарот уште во првите 20 дена.

Притисокот доаѓа во период на рекордно високи цени на дизелот, предизвикани од сериозните нарушувања на глобалниот енергетски пазар по конфликтите на Блискиот Исток и војната во Украина, како и оштетувањата и прекините во работата на рафинериите.

— реклама —

Според „Политико“, европските дипломати зад затворени врати биле незадоволни од начинот на кој Белата куќа ги поставила барањата. Еден европски дипломат, според извор запознаен со разговорите, барањето резервите да бидат ослободени под закана од американска забрана за извоз директно го нарекол „уцена“.

Во европските институции истовремено се разговарало како да се одговори на барањето на Трамп без да се создаде впечаток дека Европа попушта под американски притисок. Дел од функционерите, според текстот, се прашувале и дали Вашингтон навистина ќе се откаже од забраната за извоз доколку европските земји ги ослободат резервите.

Германија била меѓу земјите што изразиле резерви кон американското барање, а дел од европските претставници сметале дека Белата куќа се обидува да ги намали цените на горивата во САД пред изборите за Конгресот.

„Значи, сега вршат притисок врз ЕУ да ги извлече од неволја. И се закануваат со забрана на американскиот извоз за да ги принудат на тоа. Па, тоа се нарекува уцена“, изјавил за „Политико“ претставник на европската трговија со дизел.

Белата куќа има поинакво објаснување.

— реклама —

„Европјаните имаат поинакви стратешки резерви од САД. Имаат огромна количина рафинирани производи, особено дизел, и затоа сметаме дека сега имаат простор да му помогнат на светското стопанство“, изјави директорот на Националниот економски совет на Белата куќа, Кевин Хасет.

Според европски функционер цитиран од „Политико“, американскиот пристап во текот на разговорите бил „хаотичен“. Наместо барањата да бидат координирани преку Меѓународната агенција за енергија, американски претставници директно контактирале со поединечни држави, а предлозите се менувале од ден на ден.

Американскиот секретар за енергетика Крис Рајт, според изворите на медиумот, во Берлин побарал ослободување на 120 милиони барели. Следниот ден американски претставници директно го контактирале францускиот претседател Емануел Макрон и побарале ослободување на 100 милиони барели.

На крајот Г7 се договори за токму 100 милиони барели, кои треба да бидат ослободени во период од четири месеци.

— реклама —

Официјалната одлука, сепак, се повикува и на претходно преземените обврски од март за ослободување на резервите. Поради тоа, дел од европските дипломати оспоруваат дека договорот може едноставно да се претстави како целосно ново европско отстапување пред Вашингтон.

Макрон, исто така, негираше дека разговорот со Трамп бил воден под закани.

„Тонот на нашиот разговор не беше заканувачки, туку конструктивен. Сите заедно се обврзавме да ги ослободиме тие стратешки резерви. Нема забрана за извоз. Претседателот Трамп беше многу јасен за тоа“, изјави Макрон.

Од друга страна, висок американски функционер изјавил дека Вашингтон очекува договорените количества брзо да стигнат на пазарот и не ја исклучил можноста да бидат побарани дополнителни мерки.

„Внимателно ќе ја следиме имплементацијата и состојбата на пазарот. Ако бидат потребни дополнителни количества дизел, Соединетите Држави очекуваат нашите партнери да бидат подготвени да дејствуваат“, изјавил функционерот.

Белата куќа смета дека зголемувањето на понудата треба да придонесе за намалување на цените.

„Претседателот Трамп секогаш преговара за договори што се во најдобар интерес на американскиот народ. Ова ќе ја зголеми понудата на пазарот и ќе ги намали цените на дизелот“, соопшти портпаролот на Белата куќа Тејлор Роџерс.

Американската нафтена индустрија, пак, предупредувала дека евентуалната забрана за извоз на дизел може краткорочно да ги намали цените во САД, но подоцна да предизвика спротивен ефект. Рафинериите би можеле да го намалат производството доколку ги загубат големите странски пазари, додека Европа и Латинска Америка би се соочиле со дополнителен недостиг.

Г7 во официјалната одлука се обврза и да не воведува ограничувања на трговијата со енергенти меѓу земјите членки, со што засега е отстранета заканата од американска забрана за извоз на дизел.