Државниот инспекторат на Хрватска ги извести потрошувачите за повлекување на производот „Ледо Кватро Класик“ сладолед со вкусови какао-лешник, ванила, чоколадо и страчатела, во пакување од 495 грама, односно 900 милилитри.
Станува збор за производ од серијата со ознака LOT: L260227 и рок на употреба до 27 август 2027 година, кој се повлекува од продажба од превентивни причини, поради проверка на амбалажата.
Од инспекторатот соопштија дека производот не е во согласност со европската регулатива, која ги утврдува општите принципи и услови за безбедност на храната.
Од компанијата „Ледо плус“ истакнаа дека безбедноста на потрошувачите е нивен врвен приоритет и дека повеќе од шест децении работат според највисоките индустриски стандарди.
„Безбедноста на потрошувачите ни е на прво место, а одржувањето на највисоко ниво на квалитет на нашите производи останува наш приоритет“, порачаа од компанијата.
Потрошувачите, кои го купиле наведениот производ, се повикуваат да ги проверат ознаките на пакувањето и да ги следат упатствата на надлежните институции и производителот.
