Поранешниот израелски министер за одбрана и лидер на партијата „Израел Бејтену“, Авигдор Либерман, предупреди дека израелската армија би можела да остане без муниција во рок од десет дена, истовремено упатувајќи остри критики до владата на премиерот Бенјамин Нетанјаху.
Во интервју за израелската државна телевизија КАН, Либерман го критикуваше владиниот предлог со кој ултраортодоксните Евреи (харедите) би биле ослободени од задолжителната воена служба.
Тој ја обвини владата дека, за да ја зачува владејачката коалиција, е подготвена да ги загрози државните интереси.
„За десет дена израелската армија повеќе нема да има муниција“, изјави Либерман.
Осврнувајќи се на предложениот закон, тој оцени дека со него практично се легализира избегнувањето на воената служба.
Либерман, исто така, тврди дека Хамас повторно ја зацврстил контролата врз Појасот Газа и започнал повторно да произведува ракети.
Од Хамас претходно ги отфрлија ваквите тврдења, оценувајќи дека станува збор за израелска пропаганда со цел да се оправда продолжувањето на воените операции во Појасот Газа.
