Американскиот Сенат со тесно мнозинство го потврди Тод Бланш, поранешен личен адвокат на Доналд Трамп, за нов министер за правда на САД.
За неговото именување гласаа 50 сенатори, додека 49 беа против. На демократите во противењето им се приклучија републиканските сенаторки Сузан Колинс и Лиса Мурковски, а клучен беше гласот на републиканецот Бил Кесиди од Луизијана.
Бланш од април ја извршуваше функцијата вршител на должност министер за правда, откако претходно беше заменик-министер. Трамп официјално го номинираше за прв човек на Министерството за правда на 8 јуни.
Неговата потврда во Сенатот беше проследена со несогласувања и меѓу дел од републиканците. Тие имаа забелешки за начинот на кој Бланш постапувал со документите поврзани со Џефри Епстајн, како и за неговата улога во формирањето фонд вреден околу 1,56 милијарди евра, наменет за обесштетување на лица кои тврдат дека биле жртви на политички прогон од државните институции.
По притисокот од републиканските сенатори, Бланш се откажа од фондот и даде дополнителни уверувања дека тој ќе биде укинат, што му помогна да ја обезбеди потребната поддршка.
Мурковски сепак гласаше против неговото именување, предупредувајќи на политизацијата на Министерството за правда и изразувајќи сомнеж дека Бланш би можел да ги ограничи најспорните потези на администрацијата на Трамп.
Особено внимание привлече гласот на Бил Кесиди, републикански сенатор кој во 2021 година гласаше Трамп да биде прогласен за виновен во вториот процес за отповикување по нападот врз американскиот Конгрес.
„Ова не е референдум за претседателот Трамп, туку одлука за Бланш во многу специфични околности. Земајќи го предвид сето тоа, ќе гласам за Бланш“, изјави Кесиди пред гласањето.
Бланш по потврдата му се заблагодари на Трамп за довербата. Пред да стане дел од Министерството за правда, тој го застапуваше Трамп во три кривични постапки во 2023 и 2024 година.
