Поранешниот министер за надворешни работи на Унгарија, Петер Сијарто, поднесе оставка на пратеничката функција и објави дека ќе ја продолжи кариерата во кинескиот производител на електрични возила BYD, каде што ќе извршува висока меѓународна функција.
Сијарто соопшти дека прифатил, како што рече, исклучително престижна понуда од една од најзначајните светски компании. Во BYD ќе биде задолжен за надворешните односи на целата групација и за развој на нови деловни области.
Од компанијата соопштија дека тој нема да биде дел од управата на унгарската подружница, туку ќе извршува глобална функција, која не е поврзана со работењето на BYD во Унгарија и ќе подразбира чести патувања во странство.
Сијарто беше пратеник од 2002 година, а од 2014 до промената на власта во 2026 година ја извршуваше функцијата министер за надворешни работи. По изборниот пораз на Фидес оваа година, остана пратеник, но ретко учествуваше во работата на парламентот.
Неговото заминување привлече внимание бидејќи токму како министер имаше значајна улога во привлекувањето на инвестициите на BYD во Унгарија. Во 2023 година тој објави дека компанијата ќе ја изгради својата прва европска фабрика за автомобили во Сегедин, а подоцна најави и преселување на европскиот корпоративен и развоен центар на компанијата во Будимпешта.
Актуелниот унгарски премиер Петер Маѓар остро ја критикуваше одлуката на Сијарто, оценувајќи дека уште како министер ги застапувал интересите на кинеската компанија, особено при доделувањето државни субвенции и даночни олеснувања. Сијарто засега не одговорил на овие обвинувања.
Од Фидес, пак, го поздравија неговото именување, оценувајќи дека станува збор за признание за неговата работа, додека поранешниот премиер Виктор Орбан го нарече преминувањето на Сијарто во BYD „најголемиот трансфер на летото“.
