Поранешниот српски кошаркарски репрезентативец Милан Гуровиќ покажа голема присебност и храброст откако успеал да спаси возач од автомобил што се запалил во близина на центарот на Белград.
Инцидентот се случил додека Гуровиќ се враќал кон својот дом. Според информациите на српските медиуми, возилото што се движело пред него одеднаш излетало од патот и запрело покрај коловозот, непосредно пред неговиот автомобил.
Само неколку моменти подоцна избувнал пожар. Без двоумење, Гуровиќ излегол од своето возило, притрчал кон автомобилот и успеал навреме да го извлече возачот на безбедно.
Очевидците раскажуваат дека за помалку од половина минута пламенот целосно го проголтал автомобилот, па навремената интервенција на поранешниот кошаркар била пресудна.
„Сè се одвиваше молскавично. Само неколку секунди повеќе ќе значеа трагичен исход“, изјавиле сведоци, истакнувајќи дека неговата брза реакција спасила човечки живот.
