Поскапи кредити и пад на профитот ги притискаат компаниите во еврозоната

Компаниите во еврозоната се соочуваат со поскапи банкарски кредити, построги услови за финансирање и сè поголем пад на профитот. Ова го покажува кварталното истражување на Европската централна банка за пристапот на компаниите до финансии (SAFE), објавено денеска.

— реклама —

Според истражувањето за третиот квартал од 2026 година, 46 проценти од компаниите пријавиле зголемување на каматните стапки на банкарските кредити, во споредба со 42 проценти во претходниот квартал. Зголемувањето на трошоците за задолжување е особено изразено кај големите компании.

— реклама —

Покрај повисоките камати, банките ги зголемиле надоместоците и провизиите и почесто бараат дополнителни гаранции, како недвижен имот, за одобрување кредити. Воедно, одобруваат помалку заеми, а компаниите очекуваат дека во следните три месеци уште потешко ќе доаѓаат до надворешно финансирање, главно поради неповолните економски изгледи.

— реклама —

Истражувањето покажува и влошување на финансиските резултати. Во третиот квартал, нето 21 процент од компаниите пријавиле пад на профитот, наспроти 16 проценти во претходниот квартал.

Приходите продолжиле да растат кај големите компании, додека кај малите и средните претпријатија главно стагнирале. Како најголеми пречки во работењето компаниите ги посочуваат високите трошоци за производство и работа, како и недостигот од квалификувани работници, пренесува „Еуроњуз.рс“.