Поскапуваат „Мекбук“, „Ајпад“ и други уреди на Apple

Технолошкиот гигант „Епл“ ги зголеми цените на дел од своите најпопуларни производи, меѓу кои се „Мекбук“ и „Ајпад“, наведувајќи дека причина за поскапувањето се зголемените трошоци за мемориски и складишни чипови.

Според информациите на Си-Ен-Ен, наглиот раст на побарувачката за чипови е поттикнат од експанзијата на вештачката интелигенција и масовната изградба на центри за обработка на податоци ширум светот.

— реклама —

Најголемото поскапување го бележи основниот модел „Мекбук Нео“, чија цена е зголемена од 599 на 699 долари. Почетниот модел на „Ајпад“ отсега ќе чини 449 долари наместо досегашните 349, додека цената на „Ајпад Мини“ е повисока за 100 долари и сега изнесува 599 долари.

— реклама —

Повисоки цени има и кај други уреди. „Епл ТВ“ поскапува од 129 на 199 долари, слушалките „Вижн Про“ ќе се продаваат за 3.699 долари, односно за 200 долари повеќе од досега, а паметниот звучник „ХоумПод“ поскапува од 299 на 349 долари.

Новите цени веќе се објавени на интернет-продавницата на компанијата, иако кај дел од трговците сè уште се прикажани старите ценовници.

— реклама —

Од компанијата соопштија дека невидената побарувачка за меморија и складишни компоненти, предизвикана од развојот на вештачката интелигенција, довела до рекордно зголемување на цените на компонентите.

Извршниот директор, Тим Кук, уште минатата седмица предупреди дека поскапувањата се неизбежни поради глобалниот недостиг од мемориски чипови.

И покрај зголемувањето на цените кај повеќе производи, засега нема промени кај цените на „Ајфон“ и слушалките „ЕрПодс“.