Американските граѓани наскоро ќе можат да го видат потписот на претседателот Доналд Трамп на новите банкноти, додека неговиот лик ќе се најде на пригодна монета од еден долар, издадена по повод 250-годишнината од основањето на Соединетите Американски Држави.
Одлуката предизвика дебата дали е во согласност со федералниот закон, кој забранува прикажување на живи претседатели на американските пари.
Американската ковачница ќе издаде пригодни монети од еден долар со ликот на Трамп, а администрацијата тврди дека тоа е дозволено според закон од 2020 година, кој му дава овластување на министерот за финансии да издава вакви монети со мотиви поврзани со одбележувањето на 250 години од основањето на САД.
На монетата ќе биде прикажан актуелниот претседателски портрет на Трамп, а не дизајнот што претходно го предложила Комисијата за ликовни уметности. Конечната одлука ја донел министерот за финансии.
Министерот за финансии Скот Бесент, чиј потпис исто така ќе биде на новите банкноти, изјави дека поставувањето лик на жива личност на пригодна монета е законски дозволено.
„Како министер за финансии имам само два услови: на парите мора да стои натписот ‘In God We Trust’ и на нив не смее да има жива личност. Но, по повод 150-годишнината беше издадена монета со ликот на Калвин Кулиџ додека тој беше претседател, така што можеме да ставиме лик на жива личност на пригодна монета“, рече Бесент.
Тој во телевизиско интервју ги претстави и новите банкноти од 100 долари, на кои потписот на Трамп се наоѓа во долниот лев агол, веднаш над потписот на министерот за финансии.
Администрацијата веќе извесно време се залага потписот и ликот на Трамп да се најдат на американските пари, образложувајќи дека тоа е дел од одбележувањето на 250 години од основањето на САД.
Според администрацијата, пригодните монети од еден долар се разликуваат од редовните монети и од златните колекционерски изданија, а нивното издавање е предвидено со Законот за редизајн на пригодните кованици од 2020 година.
